Паёми Президенти Ҷумҳурии Тоҷикистон ҳуҷҷати сиёсӣ ва стратегӣ маҳсуб мешавад, ки самти инкишофи сиёсати давлатро дар марҳилаи ояндаи наздик ва дур муайян месозад. Маҳз тавассути Паёми ҳарсола, Пешвои миллат нуқтаҳои асосии сиёсати давлатро барои доираи васеи аҳолии мамлакат, аз он ҷумла барои фаъолон, сиёсатмадорон ва аҳли илму фарҳанг баррасӣ менамояд. Аммо муҳимтарин вазифаи Паёми Пешвои миллат дар он аст, ки тавассути он Президенти мамлакат муҳатрам Эмомалӣ Раҳмон барои вакилони Маҷлиси намояндагон ва аъзоёни Маҷлиси миллии Маҷлиси Олии Ҷумҳурии Тоҷикистон, Ҳукумат, мақомотҳои иҷроияи ҳокимияти давлатӣ самти стратегии рушди мамлакатро дар шароити рушди суръатноки ҷаҳони глобалӣ муайян менамояд. Дар асоси вазифаҳои дар Паёми Пешвои миллат гузошташуда, Маҷлиси Олӣ ҳамчун ҳокимияти қонунгузор фаъолияти қонунгузориро барои амалӣ намудани мақсадҳои стратегии давлат мушаххас мегардонад ва дар ин масир Паёми Сарвари давлат ба Маҷлиси Олӣ, ҳамвора, ҳамчун барномаи фаъолият дар самти раванди қонунгузорӣ дониста мешавад.

       Дар Паёми имсолаи Президенти Ҷумҳурии Тоҷикистон вазъи инкишофи мамлакат ва дастовардҳои он таҳлил шуда, дурнамои рушди Ҷумҳурии Тоҷикистон дар асоси таҳлили илмӣ воқеъбинона муайян гардид. Самтҳои асосии Паёми имсоларо масъалаҳои рушди иқтисодии мамлакат, амалисозии ҳадафҳои стратегии давлат, рушди илму маориф, соҳаи тандурустӣ, ҳифзи иҷтимоии аҳолӣ, рушди фарҳанги миллӣ, таҳкими волоияти қонун, таъмини амнияти миллӣ ва стратегияи сиёсати хориҷии мамлакат дар бар гирифт. Ҳамзамон хусусияти муҳими Паёми имсола дар хулосаи умумии он дар бораи ҳуввияти миллӣ инъикос гардид.

       Вобаста ба вазифаҳои стратегӣ, Тоҷикистон дар самти иқтисодӣ ба дастовардҳои назаррас ноил гардид. Иқтисодиёти кишвар дар соли 2020 4,5 фоиз ва дар соли 2021 9,2 фоиз афзоиш ёфт, ки ин нишондоди баландтарин боиси дар қатори нишондиҳандаҳои иқтисодии давлатҳои ҷаҳон қарор гирифтан гардид. Дар муқоиса дар соли 2021 ҳаҷми афзоиши маҳсулоти дохилии Чин 8,1 %, ИМА 5,7 % ва Россия 4,8 %-ро ташкил дод. Пешвои миллат дар назди сохторҳои давлатӣ вазифа гузошт, ки сатҳи афзоиши маҳсулоти дохилии мамлакат дар соли оянда дар ҳудуди на кам аз 8 фоиз нигоҳ дошта шавад. Ба соҳаҳои гуногуни иқтисоди миллӣ дар ҳаҷми умумии беш аз 5,4 миллиард сомонӣ сармояи хориҷӣ, аз ҷумла 1,3 миллиард сомонӣ сармояи мустақими хориҷӣ ҷалб карда шуд. Дар ин давра зиёда аз 193 ҳазор ҷойи кори доимӣ ва мавсимӣ ташкил карда шуда, даромади пулии аҳолӣ 10 фоиз афзоиш ёфт. Танҳо дар соли 2022, 190 ҳазор ҷойҳои нави корӣ таъсис дода шуданд.

       Вобаста ба рушди маориф ҳаминро бояд қайд намуд, ки Тоҷикистон ҳамчун давлати маърифатпарвар дар арсаи минтақа ва ҷаҳон шинохта шуд, зеро зиёда аз 40 фоизи буҷети онро барномаҳои иҷтимоӣ ва маориф ташкил медиҳанд. Дар 31 соли истиқлолият 3430 бинои таълимӣ сохта шуданд, ки дар онҳо 15 миллион хонандагон таҳсил мекунанд. Бинобар афзоиши аҳолии мамлакат, Пешвои миллат вазифа гузоштанд, ки минбаъд ҳар сол бояд на кам аз 200 бинои таълимӣ мавриди истифода карор дода шавад. Аммо дар ин самт Пешвои миллат бори дигар ба масъулияти волидайн ишорат карданд, зеро маҳз дар хона, дар шароити тарбияи волидон, фарзанд метавонад роҳи дурусти зиндагиро барои худ муайян созад.

Ҳамин тавр дар Паёми Пешвои миллат таҳлили амиқи вазъи иқтисодии мамлакат, дастовардҳои он, вазифаҳои стратегӣ барои оянда, амалисозии барномаҳои иҷтимоӣ ва инкишофи сатҳи тарбияи ватандустӣ ва ҳуввияти миллӣ ҳамчун вазифаҳои минбаъдаи сохторҳои давлатӣ ва тамоми шаҳрвандони мамлакат муайян карда шуданд.

       Аз ҳамин лиҳоз мо шаҳрвандони Тоҷикистонро зарур аст, ки дар иҷро ва амалисозии барномаҳо ва нуқтаҳои ин ҳуҷҷати стратегӣ саҳми худро гузорем.

 

МАМАДСАЛИМОВ НАСИМ АБДУЛАЗИЗОВИЧ – декани факултети таърих ва ҳуқуқи

Донишгоҳи давлатии Хоруғ ба номи М. Назаршоев