Хабарҳо

КОНФЕРЕНСИЯИ ИЛМӢ - МЕТОДӢ БА ИФТИХОРИ 90 – СОЛАГИИ АКАДЕМИК МОЁНШО НАЗАРШОЕВ

Бахшида ба 90 – солагии академик Моёншо Назаршоев дар толори асосии Донишгоҳи давлатии Хоруғ (ДДХ) конференсия илмӣ – методии устодону донишҷӯён баргузор гардид.

Дар ҷаласаи ифтитоҳии чорабинии илмӣ ректори ДДХ, профессор Шермамад Ҷонмамадов, муовинони ректор Мамадризо Алимшоев ва Таҳмина Содатқадамова, меҳмонону омӯзгорони Донишгоҳи Осиёи Марказӣ ва маорифчиёни ВМКБ иштирок намуданд.

Зимни маърӯзи худ Т. Содатқадамова қайд намуд, ки дар масири таърих шахсоне буданду ҳастанд, ки аз ибтидо амалу тақдирашонро бо тақдири халқ пайваста, ҳастии хешро ба миллату меҳан бахшидаанд. Яъне ҳамин гуна одамон ба тадриҷ ҳамчун машъали фурӯзон барои омма роҳнамои зиндагӣ мегарданд:

 Бузургии ин зумра одамон дар он аст, ки онҳо  пеш аз ҳама манфиати оммаро дар мадди  назар мегиранду баҳри ҳимояи он кӯшишҳои зиёде ба харҷ медиҳанд. Аз ин хотир, ин гурӯҳи одамон бо мурури замон сазовори эҳтироми мардум гашта, номбардори миллат мешаванд. Яке аз ин фарзандони фарзонаи миллат, ходими давлатию ҷамъиятӣ, доктори илмҳои таърих, акдемик Моёншо Назаршоев мебошанд ва худи ин абармард зодаи сарзамии  пурасрори  Бадахшон, яъне маконе аст, ки дар он ҷо симои барҷастаи давлатию сиёсӣ Шоҳфитур, Шириншоҳ Шоҳтемур ва аввалин генерали тоҷик Мастибек Тошмуҳамадов ба дунё омадаанд.

Таҳмина СОДАТҚАДАМОВА, муовини

ректор оид ба илм ва инноватсия

Гуфта шуд, ки М. Назаршоев аз рӯзҳои аввали фаъолияти корӣ то лаҳзаҳои  охирини ҳаёташ марому матлаби зиндагиро танҳо дар хизмати халқу ватан медонист. Барои мавсуф ҳамчунин омӯзгорӣ аз касбҳои муқаддас ба ҳисоб мерафт. Зеро ки омӯзгори ҳақиқӣ аз назари ӯ танҳо донишомӯз набуда, балки  мурабии шахсиятҳои сазовори давру замонҳо аст ва ӯ бояд шогирдонеро ба камол расонад, ки дар  пешбурди  ҳаёти  ҷомеа  саҳмгузор бошанд.

Бо назардошти хизматҳои шоистаи  М. Назаршоев ҳамчун олим, омўзгор, арбоби давлатӣ ва ҷамъиятии Ҷумҳурии Тоҷикистон дар инкишофи илм, фарҳанг ва маорифи ҷумҳури Шурои вазирони Ҷумхурии Тоҷикистон аз 17.10.1994 № 495 Қарорро оид ба номгузории ДДХ ба номи М. Назаршоев кабул намуду он якдилона пазируфта шуд. Ҳоло Донишгоҳи давлатии Хоруғ низ аз беҳтарин муассисаҳои таҳсилоти олии кишвар ба ҳисоб рафта, ҳамасола мутахассисони баландихтисоро тайёр мекунад.

Дар конференсия инчунин профессор Ҳоҷибеков Э, номзади илмҳои фалсафа Тавуров Қ. ва муллими калон Мирзоашрафов П. дар мавзӯҳои “Нақши профессор Моёно  Назаршоев дар инкишофи илми таърих”, “Фалсафаи Саид Суҳроби Валии Бадахшонӣ”, “М. Назаршоев – бунёдгузори Донишгоҳи давлатии Хоруғ” маърӯза карданд.

Дидоршоҳ НАСРИДДИНОВ,

мудири Шуъбаи кор бо ҷавонон

 

 

 

 

Log in

create an account